【笑談。戀愛】
今個星期接受咗幾位讀Psycho嘅大學生訪問，傾下對一D戀愛問題嘅睇法同經驗，呢個訪問非常有深度，我係指D問題…
►咩係安全感？
安全感係男人永遠唔會明，而又不斷被女人Q嘅一個term。女人喺關係上、日常生活上需要有肯定同被愛嘅感覺，佢哋因此會透過生活瑣碎事，觀察你嘅行為同選擇，從而打量你有幾愛佢。稍有閃失，天生敏銳嘅女人都會有唔secure嘅感覺，un住un住。簡單Ｄ講，安全感係一種無須差測對方嘅愛嘅境界。
但對男人嚟講好多時都摸不著頭腦，因為安全感唔會因為你做咗Ｄ咩，講咩道理，而即時說服到女人。（但你冇做D咩、做錯D咩，安全感問題就會出現 :P ）
►你俾唔俾到安全感人妻？
我唔敢答，但我好清楚點樣透過生活日常去表達對老婆嘅愛，知道佢鍾意咩、唔鍾意咩，從而作出唔同選擇。
►M到係咪大哂？
痴線有得咁嘅咩…不過與其講得咁霸道，的而且確M到喺唔同層面上，女性都有佢嘅需要。例如，飲食上你要提醒佢、疏洗時間你要等下佢、佢唔舒服你要體諒下佢…呢D都係package包埋架喎。好彩嘅係，人妻唔會發爛渣死港女mode，阿們。
►點睇放閃光彈？
認住我，我就係放閃光彈嘅人喇！不過閃光彈有好多種，我自己都好怕睇到咀對咀、收名牌禮物嘅post…通常我會放嘅（彈），都係我花好多時間整理過嘅內心感受，作為男人，你（肯）用心去分享，你收到除咗係LIKE，仲有朋友嘅認同、尊重、祝福、替你高興。
►有冇試過偷食？
有偷食會唔會答你有呢可？即係咁，成長過程中，你身邊一定有D人你會欣賞，男又好啦女又好啦，靚呀、SWEET呀、KAWAII呀、腿呀，有Ｄ嘢一隻手掌拍唔響，你點樣向外界發出咩訊息，同朋友、異性朋友相處時間、地點、活動，呢D都係你因為愛而作出嘅選擇，同人嘅關係你自己manage啦。
►點睇情侶裝／飾物？
結咗婚一定會戴住戒指，但其實我拍拖時都好鍾意戴情侶戒，呢樣嘢對我嚟講，係對外界發出訊息，對自己發出嘅提醒。至於情侶衫，同系列同牌子同色系嘅我接受到，大家都係對衣著有要求嘅人（丫，乜你睇唔出嘅咩？），嗰Ｄ咩I love her, she loves me 就一定唔OK。
►►追問：咁如果人妻要求著呢？
呀…咁著囉！
反問：其實你問呢D真係幫到你哋個project咩？定係人妻收買咗你哋叫你哋問架？會唔會俾分薄面，打返幾分薄格呢？聲音可以經過特別處理？
Search